ກອງປະຊຸມວິຊາການຄັງເງິນແຫ່ງຊາດທົ່ວປະເທດ, ໄດ້ເປີດຂຶ້ນໃນວັນທີ 09 ມັງກອນ 2019 ທີ່ນະຄອນ ຫຼວງວຽງຈັນ, ໂດຍການເປັນປະທານກ່າວເປິດກອງປະຊຸມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແລະ ສໍາເລັດໃນວັນທີ 10 ມັງກອນ 2019 ໂດຍການເປັນປະທານກ່າວປິດກອງປະຊຸມຂອງ ທ່ານ ນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ, ມີຫົວໜ້າຄັງເງິນແຫ່ງຊາດ ປະຈຳແຂວງ, ຫົວໜ້າພະແນກ,ຮອງຫົວໜ້າພະແນກ, ຜູ້ຕາງໜ້າທະນາຄານແຫ່ງສປປ ລາວ, ທະນາຄານທຸລະກິດ ແລະ ພະນັກງານວິຊາການເຂົ້າຮ່ວມ.
ໃນກອງປະຊຸມຍັງໄດ້ຮັບຟັງການສະເໜີເອກະສານສຳຄັນຕ່າງໆເປັນຕົ້ນ: ຮ່າງບົດສະຫຼຸບຕີລາຄາການຈັດຕັ້ງປະຕິບັດວຽກງານຄັງເງິນແຫ່ງຊາດ ປະຈຳປີ 2019 ແລະ ທິດທາງແຜນການປີ 2020; ຫົວໜ້າຄັງເງິນແຫ່ງຊາດ ປະຈຳແຂວງ, ຫົວໜ້າພະແນກ, ຜູ້ຕາງໜ້າທະນາຄານແຫ່ງສປປ ລາວ, ທະນາຄານທຸລະກິດ, ໄດ້ເອົາໃຈໃສ່ປະກອບຄຳຄິດເຫັນດ້ວຍຄວາມຮັບຜິດຊອບຕໍ່ບົດສະຫຼຸບເຄື່ອນໄຫວວຽກງານຂອງຄັງເງິນແຫ່ງຊາດໃນປີ 2019 ແລະ ທິດທາງແຜນການໃນປີ 2020.
ພ້ອມກັນນັ້ນ, ກອງປະຊຸມໄດ້ຮັບຮອງເອົາບັນບັນຫາສຳຄັນດັ່ງນີ້: ຫັນເອົາຄັງເງິນເມືອງຂຶ້ນກັບສາຍຕັ້ງແບບຄົບຊຸດ, ເອົາໃຈໃສ່ສະຫຼຸບສັງລວມຕົວປິດສູນໂມງ ແລະ ການສະຫຼຸບຂາດຕົວງົບປະມານໃນປີ 2019 ພ້ອມທັງການລາຍງານຕົວເລກແຕ່ລະຂັ້ນທ້ອງຖິ່ນໃຫ້ສາມາດສັງລວມລາຍງານຕາມກຳນົດເວລາ, ຮັບຮອງເອົາບົດສະຫຼຸບການ ເຄື່ອນໄຫວວຽກງານຂອງຄັງເງິນແຫ່ງຊາດໃນປີ 2019 ແລະ ທິດທາງແຜນການໃນປີ 2020, ເພີ່ມທະວີສຶກສາອົບຮົບວຽກງານການເມືອງ-ແນວຄິດໃຫ້ຖັນແຖວພະນັກງານ-ລັດຖະກອນ ແຕ່ສູນກາງຮອດທ້ອງຖິ່ນໃນຫຼາຍຮູບການ ,ເອົາໃຈໃສ່ໃນການຈັດຈັ້ງປະຕິບັດແຜນງົບປະມານທີ່ສະພາແຫ່ງຊາດຮັບຮອງ ໂດຍສຸມໃສ່ການເບີກຈ່າຍເງິນເດືອນ ເງິນອຸດໜູນເປັນບຸລິມະສິດອັນດັບໜຶ່ງ, ກວດກາເອກະສານລາຍຈ່າຍຂອງຫົວໜ່ວຍງົບປະມານອ້ອມຂ້າງສູນກາງ ແລະ ທ້ອງຖິ່ນ;ປະສານສົມທົບກັນລະຫວ່າງຄັງເງິນແຫ່ງຊາດ, ກົມງົບປະມານແຫ່ງລັດຂະແໜງງົບປະມານທ້ອງຖິ່ນ ໃນການອະນຸມັດຕົວເລກແຜນງວດ; ສືບຕໍ່ປະສານກັບທະນາຄານທຸລະກິດຂອງລັດທີ່ມີເງືື່ອນໄຂໃນການຫາວິທີການຂະຫຍາຍໜ່ວຍບໍລິການຢູ່ເມືອງຈຳນວນ 34 ເມືອງ ແລະ ຕິດຕັ້ງຕູ້ເອທີເອັມໃນ 16 ເມືອງເພື່ອໃຫ້ສາມາດເບີກຈ່າຍເງິນເດືອນເງິນອຸດໜູນໃຫ້ພະນັກງານລັດຖະກອນຜ່ານລະບົບທະນາຄານ, ຄຸ້ມຄອງ, ປັບປຸງການຈັດເກັບລາຍຮັບງົບ ປະມານຂອງບັນດາກົມລາຍຮັບດ້ວຍລະບົບທັນສະໄໝເຊື່ອມຕໍ່ກັບລະບົບ GFIS.
ໂດຍເລັ່ງໃສ່ເມືອງທີ່ມີເງື່ອນໄຂ, ເຜີຍແຜ່ແນະນຳນິຕິກຳກ່ຽວກັບການມອບລາຍຮັບງົບປະມານແຫ່ງລັດດ້ວຍລະບົບທັນສະໄໝ; ເຂັ້ມງວດໃນການຈັດຕັ້ງປະຕິບັດຄຳສັ່ງວ່າດ້ວຍການປະຢັດມັດທະຍັດລາຍຈ່າຍງົບປະມານຂອງລັດສະບັບເລກທີ 09/ນຍ, ກວດກາເອກະສານການເບີກຈ່າຍໃຫ້ຖືກຕ້ອງ, ຄຸມຄອງລາຍຮັບວິຊາການ ແລະ ຮັບຮອງເອົາບັນດາກົນໄກຂັ້ນຕອນກ່ຽວກັບວຽກງານຄັງເງິນແຫ່ງຊາດ ເພື່ອໃຫ້ວຽກງານຄັງເງິນແຫ່ງຊາດໄດ້ຮັບການແກ້ໄຂປັບປຸງມີຄວາມສະດວກວ່ອງໄວໂປ່ງໃສສາມາດກວດສອບໄດ້.
