ໃນວັນທີ 28 ສິງຫາ 2020 ຜ່ານມານີ້, ຄະນະວິຊາການຂອງກະຊວງການເງິນ, ລົງເຄື່ອນໄຫວຊຸກຍູ້ ຕິດຕາມກວດກາການຈັດຕັ້ງປະຕິບັດວຽກງານງົບປະມານ 06 ເດືອນຕົ້ນປີ ແລະ ແຜນດັດແກ້ 06 ເດືອນທ້າຍປີ 2020 ໄດ້ເປີດກອງປະຊຸມປຶກສາຫາລືຮ່ວມກັບພະແນກການເງິນແຂວງຊຽງຂວາງ, ເພື່ອຊຸກຍູ້ການຈັດຕັ້ງປະຕິບັດວຽກງານງົບປະມານ.
ໂດຍການເຂົ້າຮ່ວມຂອງທ່ານ ບົວສອນ ສີນວນທອງ ຮອງເຈົ້າແຂວງຊຽງຂວາງ ຜູ້ຊີ້ນໍາວຽກງານເສດຖະກິດ,ມີທ່ານ ນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ ກະຊວງການເງິນ, ມີຕາງໜ້າຈາກກົມອ້ອມຂ້າງກະຊວງການເງິນ, ຫົວໜ້າພະແນກການເງິນ, ຮອງຫົວໜ້າພະແນກການອ້ອມຂ້າງຂະແໜງການເງິນ, ຫົວໜ້າຫ້ອງການ-ການເງິນເມືອງພາຍໃນແຂວງຊຽງຂວາງ, ພ້ອມດ້ວຍພະນັກງານຫຼັກແຫຼ່ງຂະແໜງການເງິນເຂົ້າຮ່ວມ.
