ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານຂະແໜງ ຄັງເງິນ ປະຈໍາປີ 2021 ແລະ ທິດທາງແຜນການ ປະຈໍາປີ 2022 ໄດ້ໄຂຂຶ້ນ ໃນວັນທີ 13 ມັງກອນ 2022 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ, ໂດຍການເປັນປະທານຂອງ ທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ມີທ່ານ ນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ, ມີຕາງໜ້າຈາກບັນດາກົມອ້ອມຂ້າງກະຊວງການເງິນ, ບັນດາກົມອ້ອມຂ້າງກະຊວງການເງິນ, ພະແນກການເງິນອ້ອມຂ້າງສູນກາງ, ບັນດາທະນາຄານ-ສະຖາບັນການເງິນ ທີ່ໃຊ້ບໍລິການ ແລະ ຫົວໜ້າ, ຮອງຫົວໜ້າ ພ້ອມດ້ວຍພະນັກງານວິຊາການຂອງ ຄັງເງິນປະຈໍາແຂວງ, ນະຄອນຫຼວງ, ເມືອງ ເທດສະບານ ເຂົ້າຮ່ວມກອງປະຊຸມດ້ວຍລະບົບວີດີໂອທາງໄກ.
ໃນກອງປະຊຸມ, ທ່ານ ນາງ ວັນພອນ ພົມມະສອນ ໄດ້ໃຫ້ຮູ້ວ່າ: ກອງປະຊຸມຄັ້ງນີ້ ຈະໄດ້ຮັບຟັງການສະເໜີ ແລະ ລາຍງານ ຫຼາຍຫົວຂໍ້ທີ່ສໍາຄັນ ເພື່ອປຶກສາຫາລື ແລະ ປະກອບຄໍາຄິດຄໍາເຫັນ ເປັນຕົ້ນ: ສະຫຼຸບການເຄື່ອນໄຫວວຽກງານຮອບດ້ານ ຂອງຂະແໜງຄັງເງິນ ປີ 2021 ແລະ ທິດທາງ ແຜນການ ປີ 2022; ສະຫຼຸບການຈັດຕັ້ງປະຕິບັດ ແຜນພັດທະນາຂະແໜງຄັງເງິນ 2021 ແລະ ທິດທາງແຜນການ ປີ 2022, ເຜີຍແຜ່ແຜນດໍາເນີນງານ ສະບັບເລກທີ 4741/ກງ, ລົງວັນທີ 29 ກັນຍາ 2021 ກ່ຽວກັບການຜັນຂະຫຍາຍ ຄໍາສັ່ງວ່າດ້ວຍການເພີ່ມທະວີ ຄຸ້ມຄອງ ແລະ ຕ້ານການຮົ່ວໄຫຼ ຂອງລາຍຮັບງົບປະມານ ໄລຍະ 3 ປີ (2021-2023); ສະຫຼຸບການຈັດຕັ້ງປະຕິບັດ ແຜນງານດັ່ງກ່າວ ປະຈໍາປີ 2021; ສະຫຼຸບການຈັດຕັ້ງປະຕິບັດ ວຽກງານກວດກາ-ກວດສອບ ຄັງເງິນ ປີ 2021, ທິດທາງແຜນການ ປີ 2022; ພ້ອມກັນນັ້ນ ຍັງຈະໄດ້ຮັບຟັງການປະກອບຄໍາຄິດຄໍາເຫັນຂອງບັນດາພະແນກອ້ອມຂ້າງຄັງເງິນແຫ່ງຊາດ ຕໍ່ກັບວຽກງານກວດກາເອກະສານລາຍຈ່າຍງົບປະມານຜ່ານລະບົບຄັງເງິນ, ວຽກງານບໍລິການຄັງເງິນ, ວຽກງານຫັນເປັນທັນສະໄໝ ຂະແໜງຄັງເງິນ ແລະ ວຽກງານບັນຊີສັງລວມ.
ໃນໜຶ່ງປີຜ່ານມາຂະແໜງຄັງເງິນ ໃນຂອບເຂດທົ່ວປະເທດ ແມ່ນໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດ, ຮັກສາໄດ້ສະພາບຄ່ອງໃນການປະຕິບັດແຜນງົບປະມານແຫ່ງລັດ ຄື: ສາມາດແກ້ໄຂການເບີກຈ່າຍເງິນເດືອນຕາມແຜນບູລິມະສິດຂອງລັດຖະບານໃຫ້ພະນັກງານ-ລັດຖະກອນ, ການເບີກຈ່າຍເງິນເຄື່ອນໄຫວຮັບໃຊ້ວຽກງານວິຊາສະເພາະ, ແກ້ໄຂບັນດາໜີ້ສິນພາຍໃນ ແລະ ຕ່າງປະເທດ ໄດ້ເປັນປົກກະຕິ ແລະ ຕໍ່ເນື່ອງ, ການປະຕິບັດໜ້າທີ່ຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດຜ່ານລະບົບຄັງເງິນ ກໍ່ນັບມື້ນັບດີຂຶ້ນເທື່ອລະກ້າວ. ຄັງເງິນແຫ່ງຊາດ ໄດ້ເປັນເຈົ້າການ ແລະ ມີຄວາມຮັບຜິດຊອບສູງ ໃນການຄຸ້ມຄອງງົບປະມານແຫ່ງລັດ ເວົ້າລວມແລ້ວການຈັດຕັ້ງປະຕິບັດງົບປະມານແຫ່ງລັດ ແມ່ນໄດ້ບັນລຸໝາກຜົນດີພໍຄວນ, ນັບມື້ນັບມີການປ່ຽນແປງ ແລະ ພັດທະນາໄປສູ່ຄວາມທັນສະໄໝເປັນກ້າວໆ, ຮັດກຸມເຂົ້າສູ່ກົດໝາຍ ແລະ ລະບຽບການເຮັດໃຫ້ການປະຕິບັດໜ້າທີ່ວຽກງານວິຊາສະເພາະມີຄຸນນະພາບ, ສາມາດບັນລຸໝາກຜົນໄດ້ຕາມລະດັບຄາດໝາຍທີ່ວາງໄວ້.
ໃນກອງປະຊຸມ, ຍັງໄດ້ຮັບຟັງການໂອ້ລົມຂອງ ທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ເພື່ອຊີ້ນໍາບາງບັນຫາທີ່ຄວນເອົາໃຈໃສ່ ໃນການຈັດຕັ້ງປະຕິບັດວຽກງານ ເປັນຕົ້ນ ໃນການຄຸ້ມຄອງລາຍຮັບງົບປະມານ ດ້ວຍການນໍາໃຊ້ລະບົບທັນສະໄໝ ທີ່ຍັງເຫັນວ່າພົບຄວາມຫຍຸ້ງຍາກໃນການຈັດຕັ້ງປະຕິບັດ ຕ້ອງໄດ້ພ້ອມກັນຄົ້ນຄວ້າ, ແກ້ໄຂໂດຍໄວ ລະຫວ່າງ ຄັງເງິນແຫ່ງຊາດ ກັບ ບັນດາກົມລາຍຮັບ ໃຫ້ມີຄວາມເຂົ້າໃຈ ເປັນເອກະພາບໃນລວງດຽວກັນ ໃນຂອບເຂດທົ່ວປະເທດ; ພ້ອມນັ້ນກໍ່ໃຫ້ກວດກາຄືນ ວ່າຍັງມີທ້ອງຖິ່ນໃດ ທີ່ຍັງເກັບລາຍຮັບເປັນເງິນສົດ ຕ້ອງໄດ້ຊຸກຍູ້ໃຫ້ຫັນໄປມອບຜ່ານລະບົບທະນາຄານ ເພື່ອຫຼຸດຜ່ອນການເກັບລາຍຮັບເປັນເງິນສົດ ຢູ່ບັນດາຄັງເງິນປະຈໍາແຂວງ, ເມືອງ ແລະ ນະຄອນ; ການຈັດຕັ້ງປະຕິບັດການເບີກຈ່າຍເງິນເດືອນ, ເງິນອຸດໜູນຕາມຄຳສັ່ງ ເລກທີ 55/ນຍ ເຫັນວ່າຢູ່ບາງທ້ອງຖິ່ນຍັງຊັກຊ້າ ເນື່ອງຈາກຂອດການປະກອບເອກະສານ ຂອງບັນດາຫົວໜ່ວຍງົບປະມານ ຫາ ຄັງເງິນແຫ່ງຊາດ; ຕໍ່ກັບບັນຫາດັ່ງກ່າວຄັງເງິນແຫ່ງຊາດສູນກາງ ຕ້ອງມອບຄວາມຮັບຜິດຊອບໃຫ້ຄັງເງິນປະຈໍາທ້ອງຖິ່ນ ຈັດກອງປະຊຸມປຶກສາຫາລື, ເກັບກໍາຂໍ້ມູນກັບບາງຂະແໜງການ, ບາງຫົວໜ່ວຍງົບປະມານທີ່ຍັງເຫັນວ່າມີຄວາມຊັກຊ້າ ໃຫ້ເພີ່ມຄວາມເປັນເຈົ້າການ ແລະ ເອົາໃຈໃສ່ໃນການປະກອບເອກະສານ, ສ້າງບົດສະຫຼຸບລາຍງານ ລາຍຮັບ-ລາຍຈ່າຍ ງົບປະມານທົ່ວປະເທດ ຕ້ອງຮັບປະກັນດ້ານຕົວເລກໃຫ້ຖືກຕ້ອງ, ຄົບຖ້ວນ ໃຫ້ສະຫຼຸບສົມທຽບໃຫ້ກົງກັນ ແລະ ທັນຕາມກໍານົດເວລາ; ຕ້ອງກວດກາຄືນບັນດາຫົວໜ່ວຍງົບປະມານທີ່ມີໜີ້ຕ້ອງສົ່ງໃຫ້ຄັງເງິນແຫ່ງຊາດ, ເພີ່ມທະວີການຊຸກຍູ້ຕິດຕາມ ແລະ ກວດກາພາຍໃນຂະແໜງຄັງເງິນ ໃນຂອບເຂດທົ່ວປະເທດ ເພື່ອສະກັດກັນບໍ່ໃຫ້ເກີດມີປະກົດການຫຍໍ້ທໍ້ໃນຂະແໜງການເງິນ ເວົ້າລວມ, ເວົ້າສະເພາະແມ່ນຢູ່ຄັງເງິນຂັ້ນທ້ອງຖິ່ນ ໃນການສວຍໃຊ້ໜ້າທີ່, ຕໍາແໜ່ງ, ຊ່ອງຫວ່າງ ແລະ ສວຍໂອກາດລັກລອບເອົາເງິນຂອງລັດ ໄປໃຊ້ສ່ວນຕົວ ທີ່ຜິດຕໍ່ວິໄນການເງິນ; ຕ້ອງໄດ້ມີຄວາມເອົາໃຈໃສ່ໃນຂອດການປະສານສົມທົບຢ່າງກົມກຽວ ລະຫວ່າງ ຄັງເງິນແຫ່ງຊາດ ແລະ ກົມງົບປະມານແຫ່ງລັດ, ຄັງເງິນປະຈໍາທ້ອງຖິ່ນ ແລະ ຂະແໜງງົບປະມານ ໃນຂອບເຂດທົ່ວປະເທດ ໃນຂອດການອະນຸມັດລາຍຈ່າຍ ໂດຍອີງໃສ່ຄວາມອາດສາມາດໃນການເກັບລາຍຮັບ ແລະ ຄວາມເປັນຈິງ ຂອງເງິນທີ່ມີໃນລະບົບຄັງເງິນ ເພື່ອແກ້ໄຂສະພາບຄ່ອງ ຂອງຄັງເງິນແຕ່ລະຂັ້ນ.
