ໃນລະຫວ່າງ ວັນທີ 17-18 ມີນາ 2022, ທີ່ຄັງເງິນປະຈຳແຂວງບໍລິຄຳໄຊ ໄດ້ຈັດກອງປະຊຸມຝຶກອົບຮົມ ການນຳໃຊ້ລະບົບຂໍ້ມູນຂ່າວສານການເງິນ (ລະບົບ RTIS) ເຂົ້າໃນການຈັດຕັ້ງປະຕິບັດວຽກງານວິຊາສະເພາະ ການຄຸ້ມຄອງລາຍຮັບ-ລາຍຈ່າຍ ຜ່ານລະບົບທະນາຄານ ແລະ ລະບົບຄັງເງິນ, ໂດຍການເປັນປະທານຂອງ ທ່ານ ບົວວັນ ແກ້ວອັດສາວົງ, ຫົວໜ້າຄັງເງິນປະຈຳແຂວງບໍລິຄຳໄຊມີຜູ້ເຂົ້າຮ່ວມທັງໝົດ 45 ທ່ານ ໃນນັ້ນ, ມີບັນດາ ທ່ານ ຮອງຫົວໜ້າຄັງເງິນປະຈຳແຂວງ, ຫົວໜ້າຂະແໜງ-ຮອງຫົວໜ້າຂະແໜງ ແລະ ວິຊາການ ຈາກຄັງເງິນປະຈຳແຂວງ ຈຳນວນ 29 ທ່ານ, ຄັງເງິນປະຈຳເມືອງ 04 ເມືອງ: ເມືອງປາກຊັນ ຈຳນວນ 04 ທ່ານ, ເມືອງບໍລິຄັນ ຈຳນວນ 04 ທ່ານ, ເມືອງປາກກະດິງ ຈຳນວນ 02 ທ່ານ ແລະ ເມືອງທ່າພະບາດ ຈຳນວນ 02 ທ່ານ ແລະ ຄະນະວິຊາການຈາກຄັງເງິນແຫ່ງຊາດ ຈຳນວນ 04 ທ່ານ.
ໃນກອງປະຊຸມຝຶກອົບຮົມໄດ້ດຳເນີນໄປດ້ວຍບັນຍາກາດອັນຟົດຟື້ນ ຜູ້ເຂົ້າຮ່ວມກອງປະຊຸມໄດ້ຮັບຟັງການນຳສະເໜີ ແລະ ແນະນໍາການຈັດຕັ້ງປະຕິບັດວຽກງານຕົວຈິງກັບທີ່ ກ່ຽວກັບເຕັກນິກການບັນທຶກບັນຊີຕາມພາລະບົດບາດ 2057/ກງ, ການນຳໃຊ້ຟັງຊັ່ນຕ່າງໆ ໃນການບັນທຶກບັນຊີ ລາຍຮັບ-ລາຍຈ່າຍ ເຊັ່ນ:
- ການອອກໃບຮັບເງິນຂຽນໃບແຈ້ງມອບດ້ວຍມື, ການອອກໃບຮັບເງິນຕາາມໃບແຈ້ງມອບຜ່ານລະບົບ TaxRis, ການຕິດຕາມລາຍຮັບງົບປະມານທີ່ມອບຜ່ານລະບົບທະນາຄານແບບ Auto Real-Time, ການບັນທຶກລາຍຮັບຕິດພັນເງິນຝາກ, ການບັນທຶກບັນຊີລາຍຮັບຕິດພັນໃບຄຳສັ່ງຈ່າຍ, ໃບຖອນເງິນ ແລະ ການບັນທຶກລາຍຮັບພາສີພູດສູນກາງຢູ່ທ້ອງຖິ່ນ;
- ການຄຸ້ມຄອງບັນຊີເງິນຝາກ, ການເປີດບັນຊີເງິນຝາກ 47 ແລະ ການເຄື່ອນໄຫວ ບັນທິກບັນຊີ ຮັບ-ຈ່າຍ ບັນຊີເງິນຝາກ ຂອງບັນດາຂະແໜງການ;
- ການສະຫລຸບລາຍງານ ລາຍຮັບ-ລາຍຈ່າຍ ງົບປະມານ, ສົມທຽບບັນຊີຕ່າງໆ ແລະ ການເບິ່ງໃບດຸ່ນດ່ຽງ;
- ການບັນທຶກແຜນງວດ/ປີ, ການບັນທຶກແຜນອະນຸມັດ, ຂັ້ນຕອນການສ້າງໃບຖອນເງິນ-ໃບຄຳສັ່ງຈ່າຍ, ການຮັບຮູ້ລາຍຈ່າຍ, ການຮັບສະໂນດໃບຖອນເງິນເຫັນດີຈ່າຍ, ການສ້າງສະໂນດເຫັນດີຈ່າຍ, ຂັ້ນຕອນການຊຳລະ ສົ່ງສະໂນດໄປຈ່າຍຢູ່ທະນາຄານ ແລະ ການສະຫລູບລາຍງານລາຍຈ່າຍງົບປະມານ.
ນອກນັ້ນ, ຍັງໄດ້ມີການຖາມ-ຕອບ ແລກປ່ຽນຄວາມຄິດເຫັນ ລັກສະນະວິຊາການ, ມີການລະດົມແນວຄວາມຄິດ ເພື່ອສະເໜີວິທີແກ້ໄຂບັນຫາທີ່ພົບເຫັນຕົວຈິງ ໃນການຈັດຕັ້ງປະຕິບັດວຽກງານວິຊາສະເພາະຄັງເງິນ ລະຫວ່າງບັນດາຄະນະວິທະຍາກອນ ແລະ ນັກສຳມະນາກອນ, ພາຍຫລັງສຳເລັດ ການຝຶກອົບຮົມຍັງໄດ້ມີການປະເມີນຫລັກສູດການຝຶກອົບຮົມ ແລະ ລະດັບຄວາມຮັບຮູ້ກ່ອນ-ຫລັງ ການຝຶກອົບຮົມ ຂອງບັນດານັກສຳມະນາກອນ ເພື່ອເປັນຂໍ້ມູນໃນການປັບປຸງຮູບແບບການຝຶກອົບຮົມ ໃນການຈັດຕັ້ງປະຕິບັດວຽກງານຝຶກອົບຮົມ ແລະ ພັດທະນາບຸກຄະລາກອນໃນຕໍ່ໜ້າ.
