ໃນລະຫວ່າງວັນທີ 18-20 ພຶດສະພາ 2022 ທີ່ແຂວງວຽງຈັນ, ຄັງເງິນແຫ່ງຊາດ ກະຊວງການເງິນ, ໄດ້ຈັດກອງປະຊຸມສຳມະນາຄຳແນະນຳກ່ຽວກັບການຄຸ້ມຄອງ ແລະ ບໍລິຫານແຫຼ່ງເງິນໃນລະບົບຄັງເງິນ, ການກະກຽມຈັດຕັ້ງປະຕິບັດບັນຊີລວມສູນຄັງເງິນ (TSA) ແລະ ເຜີຍແຜ່ແນະນຳການນໍາໃຊ້ລະບົບຄຸ້ມຄອງຂໍ້ມູນຂ່າວສານຄັງເງິນ, ໂດຍການເປັນປະທານຂອງທ່ານ ນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ, ມີຫົວໜ້າ, ຮອງຫົວໜ້າຄັງເງິນປະຈຳແຂວງ, ນະຄອນຫຼວງ, ບັນດາຫົວໜ້າຂະແໜງ, ຮອງຫົວໜ້າຂະແໜງ, ວິຊາການຄັງເງິນປະຈຳແຂວງ, ນະຄອນຫຼວງ, ບັນດາວິທະຍາກອນ ຈາກຄັງເງິນແຫ່ງຊາດ, ຕາງໜ້າກົມນະໂຍບາຍການເງິນ, ຕາງໜ້າໜ່ວຍງານຈັດຕັ້ງປະຕິບັດໂຄງການ (PIU) ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. ກອງປະຊຸມດັ່ງກ່າວພາຍໃຕ້ການສະໜັບສະໜູນຈາກ ແຜນງານຂອງທະນາຄານໂລກ ໃນການຊຸກຍູ້ການປະຕິຮູບການຄຸ້ມຄອງການເງິນແຫ່ງລັດ ໂດຍການໃຫ້ທຶນຈາກ ສະຫະພາບເອີຣົບ.
![](https://treasury.gov.la/wp-content/uploads/2022/05/9756158465-1536x1024-1-1024x683.jpg)
![](https://treasury.gov.la/wp-content/uploads/2022/05/IMG_0555-1536x1024-1-1024x683.jpg)
ໂອກາດດັ່ງກ່າວ, ທ່ານ ນາງ ວັນພອນ ພົມມະສອນ ໃຫ້ຮູ້ວ່າ: ໂດຍອີງຕາມແຜນພັດທະນາຂະແໜງຄັງເງິນ 05 ປີ ໄລຍະປີ 2021-2025 ໃນແຜນງານທີ 6 ກ່ຽວກັບວຽກງານກົງຈັກການຈັດຕັ້ງ ແລະ ພັດທະນາບຸກຄະລາກອນ, ຊຶ່ງ ພະນັກງານ–ລັດຖະກອນຂະແໜງຄັງເງິນຕ້ອງໄດ້ຜ່ານການຝຶກອົບຮົມວຽກງານວິຊາສະເພາະຢ່າງນ້ອຍ 40 ຊົ່ວໂມງຕໍ່ຄົນຕໍ່ປີ ເພື່ອເປັນການພັດທະນາຄວາມຮູ້, ຄວາມສາມາດ ແລະ ຮຽນຮູ້ກັບສະພາບປ່ຽນແປງໃໝ່ໃນແຕ່ລະໄລຍະ.
ຍ້ອນຄວາມຮຽກຮ້ອງຕ້ອງການ ແລະ ເຫັນໄດ້ເຖິງຄວາມຈໍາເປັນຂອງວຽກງານພັດທະນາຊັບພະຍາກອນມະນຸດຂອງຂະແໜງຄັງເງິນ, ເວົ້າສະເພາະແຜນການຝຶກອົບຮົມໃຫ້ພະນັກງານ-ລັດຖະກອນຂະແໜງຄັງເງິນ ໃຫ້ມີຄວາມຮັບຮູ້ເຂົ້າໃຈເລິກເຊິ່ງທາງດ້ານທິດສະດີ ແລະ ພຶດຕິກໍາ ໃນການປະຕິບັດວຽກງານວິຊາສະເພາະຂອງຄັງເງິນ.
ກອງປະຊຸມສໍາມະນາໃນຄັ້ງນີ້ຈະໄດ້ສຳມະນາເຂົ້າໃຈກ່ຽວກັບບັນດາຫົວຂໍ້ທີ່ສໍາຄັນຕ່າງໆເປັນຕົ້ນ: ຄໍາແນະນໍາ ກ່ຽວກັບ ການຄຸ້ມຄອງ ແລະ ບໍລິຫານແຫຼ່ງເງິນ ໃນລະບົບຄັງເງິນ ສະບັບເລກທີ 3153/ກງ, ລົງວັນທີ 29 ກໍລະກົດ 2019 ແລະ ພາບລວມໃນການຈັດຕັ້ງປະຕິບັດວຽກງານບັນຊີລວມສູນຄັງເງິນ (TSA) ໃນໄລຍະຜ່ານມາ, ຮັບຟັງການນໍາສະເໜີ ການປັບປຸງບາງເນື້ອໃນ ຄໍາແນະນໍາ ກ່ຽວກັບ ການຄຸ້ມຄອງບັນຊີເງິນຝາກ ຂອງຫົວໜ່ວຍງົບປະມານ, ອົງການບໍລິຫານວິຊາການ ແລະ ກອງທຶນຂອງລັດ ຜ່ານລະບົບຄັງເງິນ ໃນຂອບເຂດທົ່ວປະເທດ ແລະ ສະເໜີຮູບແບບໃນການຈັດຕັ້ງປະຕິບັດວຽກງານບັນຊີລວມສູນຄັງເງິນໃນຕໍ່ໜ້າ, ພາບລວມ ແລະ ການນໍາໃຊ້ລະບົບຄຸ້ມຄອງຂໍ້ມູນຂ່າວສານເຂົ້າໃນການຈັດຕັ້ງປະຕິບັດວຽກງານວິຊາສະເພາະ.
![](https://treasury.gov.la/wp-content/uploads/2022/05/9696-1536x1024-1-1024x683.jpg)
![](https://treasury.gov.la/wp-content/uploads/2022/05/IMG_0570-1-1536x1024-1-1024x683.jpg)
![](https://treasury.gov.la/wp-content/uploads/2022/05/IMG_0570-1536x1024-1-1024x683.jpg)
ໃນກອງປະຊຸມຍັງໄດ້ມີການປະກອບຄໍາຄິດເຫັນຈາກບັນດາຄັງເງິນປະຈໍາແຂວງ, ນະຄອນຫຼວງເພື່ອເປັນການແລກປ່ຽນ ບັນຫາທີ່ພົບເຫັນຕົວຈິງໃນການຈັດຕັ້ງປະຕິບັດວຽກງານວິຊາສະເພາະຂອງຄັງເງິນຂອງຕົນທີ່ຜ່ານມາ ເພື່ອເປັນການແລກປ່ຽນບົດຮຽນ ຊອກຫາວິທີແກ້ໄຂ, ສະເໜີແນະນໍາວິທີທາງ, ກຳນົດບັນດາວິທີການ, ມາດຕະການໃນການປັບປຸງວຽກງານຄັງເງິນ, ການສ້າງແຜນຄາດຄະເນລາຍຮັບ-ລາຍຈ່າຍ ແລະ ຈັດສັນແຫຼ່ງເງິນປະຈໍາເດືອນ, ລວມທັງການສັງລວມຍອດເຫຼືອເງິນຢູ່ໃນບັນຊີເງິນຝາກທະນາຄານ, ເພື່ອກ້າວໄປເຖິງຄວາມເຂົ້າໃຈທີ່ຈະແຈ້ງ ແລະ ມີຄວາມເປັນເອກະພາບຕໍ່ບັນດາບັນຫາທີ່ຍົກຂື້ນ ເພື່ອພ້ອມກັນປັບປຸງ ແລະ ແກ້ໄຂວຽກງານໃຫ້ນັບມື້ນັບເຂັ້ມແຂງເປັນກ້າວໆ.
ພ້ອມທັງໄດ້ຮັບຟັງການນໍາສະເໜີບົດຮຽນໃນການຈັດຕັ້ງປະຕິບັດວຽກງານບໍລິຫານແຫຼ່ງເງິນ ແລະ ວຽກງານລວມສູນບັນຊີຄັງເງິນ (TSA) ຂອງສາກົນທີ່ເປັນຊ່ຽວຊານຂອງທະນາຄານໂລກທີ່ຈະຊ່ວຍໃຫ້ຄໍາແນະນໍາໃນດ້ານຕ່າງໆກ່ຽວກັບການປະຕິຮູບ ການຈັດຕັ້ງປະຕິບັດວຽກງານວິຊາສະເພາະຂອງຂະແໜງຄັງເງິນຜານລະບົບວີດີໂອທາງໄກ.