ທ່ານ ນາງ ວັນພອນ ພົມມະສອນ ຄະນະປະຈໍາພັກກະຊວງ, ຫົວໜ້າຄັງເງິນແຫ່ງຊາດ ຕິດຕາມ ແລະ ຄະນະນໍາກະຊວງການເງິນ. ພາຍໃຕ້ການນໍາພາໂດຍທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການເງິນ ສປປ ລາວ, ຄະນະກົມ, ຄະນະວິຊາການຈໍານວນໜຶ່ງ ຂອງກະຊວງການເງິນ, ເດີນທາງໄປຢ້ຽມຢາມ ແລະ ເຄື່ອນໄຫວເຮັດວຽກທາງລັດຖະການຢູ່ ສສ ຫວຽດນາມ ໃນລະຫວ່າງ ວັນທີ 24-29 ກໍລະກົດ 2022. ໂດຍຕອບສະໜອງຕາມຄໍາເຊີນຂອງຄະນະຜູ້ແທນຂັ້ນສູງ ກະຊວງການເງິນ ສສ ຫວຽດນາມ.
ຈຸດປະສົງກໍ່ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດລາວ ແລະ ຫວຽດນາມເປັນຕົ້ນ: ວັນສ້າງຕັ້ງສາຍພົວພັນທາງການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ ແລະ ຕິດພັນກັບວຽກງານແຜນການຮ່ວມຮ່ວມມືລະຫວ່າງກະຊວງການເງິນ ສສ ຫວຽດນາມ ແລະ ກະຊວງການເງິນ ສປປ ລາວ ປະຈຳປີ 2022.
ໃນການເດີນທາງໄປຢ້ຽມຢາມ ແລະ ເຄື່ອນໄຫວເຮັດວຽກທາງລັດຖະການຢູ່ ສສ ຫວຽດນາມໃນຄັ້ງນີ້. ຕ່າງໜ້າລັດຖະບານ ຂອງ ສສ ຫວຽດນາມ ໂດຍທ່ານ ໂຮ່ ດຶກຟຸກ, ລັດຖະມົນຕີກະຊວງການເງິນ ໄດ້ຈັດພິທີມອບໃບຍ້ອງຍໍບຸກຄົນ ໃຫ້ແກ່ບັນດາຄະນະຜູ້ແທນຂອງກະຊວງການເງິນ ສສປ ລາວ ທີ່ໄດ້ປະກອບສ່ວນຢ່າງຕັ້ງໜ້າ ແລະ ມີຜົນສໍາເລັດອັນຈົບງາມ ໃນການຈັດຕັ້ງປະຕິບັດວຽກງານຮ່ວມມືສອງຝ່າຍລະຫວ່າງ ກະຊວງການເງິນ ສປປ ລາວ ແລະ ກະຊວງການເງິນ ສສ ຫວຽດນາມ ໃນຕະລອດໄລຍະ 15 ປີຜ່ານມາ.
ພ້ອມດຽວກັນນັ້ນ, ໃນວັນທີ່ 27 ກໍລະກົດ 2020 ຄະນະຜູ້ແທນຂອງກະຊວງການເງິນ ສປປ ລາວ ໄດ້ຮ່ວມເຮັດວຽກກັບຄະນະນໍາ ຂອງຄັງເງິນແຫ່ງລັດ ສສ ຫວຽດນາມ. ເພື່ອສະຫຼຸບຕີລາຄາ ການຈັດຕັ້ງປະຕິບັດວຽກງານຮ່ວມມືສອງຝ່າຍລະຫວ່າງຄັງເງິນແຫ່ງຊາດ ສປປ ລາວ ແລະ ຄັງເງິນແຫ່ງລັດ ສສ ຫວຽດນາມ ໃນໄລຍະຜ່ານມາ ພ້ອມທັງປຶກສາຫາລື ທິດທາງແຜນການຮ່ວມມືໃນຊຸມປີຕໍ່ໜ້າ ແລະ ການຮ່ວມມືໃນປີ 2022. ໂດຍກອງປະຊຸມດັ່ງກ່າວ ຍັງໄດ້ລົງເລີກບາງໜ້າວຽກວິຊາສະເພາະທີ່ສໍາຄັນຂອງຄັງເງິນແຫ່ງຊາດ ເປັນຕົ້ນແມ່ນ
1. ວຽກງານການຫັນທັນສະໄໝຂະແໜງຄັງເງິນ ການນໍາໃຊ້ລະບົບໄອທີ ເຂົ້າຊ່ວຍໃນການຄຸ້ມຄອງລາຍຮັບ ແລະ ຈັດຕັ້ງປະຕິບັດລາຍຈ່າຍງົບປະມານ, ການແບ່ງຂັ້ນຄຸ້ມຄອງ ລະຫວ່າງສູນກາງ ແລະ ທ້ອງຖິ່ນ;
2. ການຄຸ້ມຄອງລວມສູນບັນຊີເງິນຝາກຜ່ານລະບົບຄັງເງິນ ແລະ ລະບົບທະນາຄານ ແລະ ວຽກງານສໍາຄັນອື່ນໆອີກຈໍານວນໜຶ່ງ.
ຄະນະຜູ້ແທນດັ່ງກ່າວຂອງກະຊວງການເງິນ ຈະສຶບຕໍ່ເຮັດວຽກຮ່ວມກັບບັນດາກົມຂອງກະຊວງການເງິນ ສສ ຫວຽດນາມຮອດວັນທີ 29 ກໍລະກົດ 2022 ຈຶ່ງຈະໄດ້ເດີນທາງກັບ ສປປ ລາວ.