ກອງປະຊຸມປະເມີນ ການຈັດຕັ້ງປະຕິບັດວຽກງານ ຂອງພະນັກງານ – ລັດຖະກອນ ຂັ້ນຫົວໜ້າ, ຮອງຫົວໜ້າຄັງເງິນແຫ່ງຊາດ ແລະ ຂັ້ນຫົວໜ້າ ແລະ ຮອງຫົວໜ້າພະແນກ ຂອງຄັງເງິນແຫ່ງຊາດ, ໄດ້ຈັດຂຶ້ນໃນວັນທີ 24–25 ສິງຫາ 2022 ທີ່ ຫ້ອງປະຊຸມ ກະຊວງການເງິນ, ໂດຍການປະທານ ຂອງທ່ານ ນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ, ທັງເປັນຄະນະຮັບຜິດຊອບ ປະເມີນຜົນຄືນການປະຕິບັດວຽກງານຂອງພະນັກງານລັດ-ຖະກອນ ຂະແໜງການເງິນ ຂັ້ນສູນກາງ ແລະ ທອງຖິ່ນ, ກອງປະຊຸມມີ ທ່ານ ຫອມຮັກ ສຸນະວັນ ຮອງຫົວໜ້າກົມຈັດຕັ້ງ ແລະ ພະນັກງານກະຊວງການເງິນ, ມີຮອງຫົວໜ້າກົມ, ຫົວໜ້າພະແນກ ຮອງຫົວໜ້າພະແນກ ສະມາຊິກພັກສົມບູນຂອງຄັງເງິນແຫ່ງຊາດ ເຂົ້າຮ່ວມ.
ໃນກອງປະຊຸມ ທ່ານ ຫອມຮັກ ສຸນະວັນ ໄດ້ແນະນໍາໃຫ້ຮູ້ກ່ຽວກັບການໃຫ້ຄະແນນ ແລະ ມີຄໍາເຫັນປິດລັບ ໃນການປະເມີນຜົນໃນຄັ້ງນີ້, ພ້ອມນີ້ ໃນກອງປະຊຸມ ຍັງມີການສະເໜີຜ່ານໃບປະເມີນຂອງຫົວໜ້າຄັງເງິນແຫ່ງຊາດ, ຮອງຫົວໜ້າຄັງເງິນແຫ່ງຊາດ, ບັນດາຫົວໜ້າພະແນກ, ຮອງຫົວໜ້າພະແນກ ທັງ 08 ພະແນກ ທີ່ຂຶ້ນກັບຄັງເງິນແຫ່ງຊາດ ຫຼັງຈາກນັ້ນ, ຜູ້ເຂົ້າທັງໝົດກໍ່ໄດ້ພ້ອມກັນປະກອບຄໍາຄິດເຫັນ ໃສ່ບົດປະເມີນຜົນ ຂອງແຕ່ລະທ່ານທີ່ສະເໜີຜ່ານມາ ຢ່າງກົງໄປກົງມາ ສ່ອງແສງໃຫ້ເຫັນໄດ້ດ້ານດີ ຜົນສໍາເລັດໃນການຊີ້ນໍາ-ນໍາພາ ການຈັດຕັ້ງປະຕິບັດວຽກງານ ໃນໄລຍຜ່ານມາ ມີລັກສະນະພົ້ນເດັ່ນ ແລະ ສໍາເລັດໄດ້ຫຼາຍດ້ານຢ່າງຕັ້ງໜ້າ ພ້ອມທັງໃຫ້ຄະແນນ ແລະ ມີຄໍາເຫັນປິດລັບ ໃນການປະເມີນຜົນ
ພ້ອມທັງສະເໜີໃຫ້ ສະມາຊິກພັກ-ພະນັກງານ ຫຼັກແຫຼ່ງ ຂອງຄັງເງິນແຫ່ງຊາດ ຕ້ອງໄດ້ເປັນເຈົ້າການ ແລະ ຍົກສູງ ຄວາມຮັບຜິດຊອບ ໃນການໃຫ້ຄະແນນ ຂອງການປະເມີນຜົນ ຢ່າງພາວະວິໃສ ຕໍ່ກັບຜົນສຳເລັດ ຫຼື ຜົນ ໃນການປະຕິບັດວຽກງານຕົວຈິງ ຂອງຄະນະຄັງເງິນແຫ່ງຊາດ, ຄະນະພະແນກ ໃນຄັ້ງນີ້ ຕາມແຜນດໍາເນີນງານ, ຜົນສໍາເລັດ ໃນການປະຕິບັດວຽກງານຕາມການມອບໝາຍ, ຕາມການກໍານົດຕົວຊີ້ວັດ ແລະ ຕາມການແບ່ງຄວາມຮັບຜິດຊອບທີ່ຊັດເຈນ ຢ່າງມີຄວາມເໝາະສົມ ເພື່ອໃຫ້ສອດຄ່ອງກັບຄວາມເປັນຈິງ ແລະ ຫຼີກເວັ້ນບໍ່ໃຫ້ມີແນວຄິດ ອັກຄະຕິ ຊຶ່ງຕ້ອງເບິ່ງໃຫ້ເຫັນໄດ້ເຖິງຄວາມເປັນຈິງ ຢ່າງພາວະວິໃສ, ຍຸຕິທຳ ແລະ ຮັກສາ ໄດ້ຄວາມສາມັກຄີພາຍໃນ
