ໃນລະຫວ່າງວັນທີ 12-23 ກັນຍາ 2022, ຄັງເງິນແຫ່ງຊາດ ໄດ້ແຕ່ງຕັ້ງຄະນະວິຊາການ ເພື່ອເຂົ້າຮ່ວມຖອດຖອນບົດຮຽນ ນໍາຄັງເງິນແຫ່ງລັດ ສສ ຫວຽດນາມ ໂດຍການນໍາພາ ຂອງທ່ານ ໜູເຊີຍ ພົມສີຈັນ ຮອງຫົວໜ້າຄັງເງິນແຫ່ງຊາດ, ເຊິ່ງມີຫົວຂໍ້ແລກປ່ຽນບົດຮຽນ ດັ່ງນີ້:
ວຽກງານບໍລິຫານແຫຼ່ງເງິນ: ກົດໝາຍ, ນິຕິກໍາ-ລະບຽບການ ເພື່ອຄຸ້ມຄອງ, ຕິດຕາມການແບ່ງຂັ້ນຄຸ້ມຄອງລາຍຮັບ-ປະຕິບັດລາຍຈ່າຍງົບປະມານແຫ່ງລັດ ລະຫວ່າງ ຂັ້ນສູນກາງ ແລະ ທ້ອງຖິ່ນ. ການຄຸ້ມຄອງບັນຊີລວມສູນ (TSA) ພ້ອມນັ້ນກໍ່ໄດ້ແລກປ່ຽນບົດຮຽນໃນການຈັດຕັ້ງປະຕິບັດ, ຜັນຂະຫຍາຍລະບົບ IFMIS, TABMIS ຂອງ ສສ ຫວຽດນາມ ແຕ່ປີ 2009 ຫາ ປະຈຸບັນ.
ການຄຸ້ມຄອງ, ຕິດຕາມ ການປະກອບເອກະສານຂອງບັນດາຫົວໜ່ວຍງົບປະມານ ຫາ ຂະແໜງຄັງເງິນ ແລະ ກົນໄກການເບີກຈ່າຍງົບປະມານແຫ່ງລັດ ຜ່ານຮູບແບບເອເລັກໂຕນິກ
- ວຽກງານຂໍ້ມູນຂ່າວສານ ໂດຍການນໍາໃຊ້ລະບົບ, ເຄືອງມືທັນສະໄໝ ເຂົ້າໃນການເຄື່ອນໄຫວວຽກງານວິຊາສະເພາະຄັງເງິນ ໃຫ້ມີຄວາມສະດວກ, ວອງໄວ, ທັນສະໄໝ ແລະ ສາມາດກວດສອບໄດ້.
- ວຽກງານຝຶກອົບຮົມ ໃຫ້ພະນັກງານວິຊາການ ຢູ່ຂັ້ນສູນກາງ ແລະ ທ້ອງຖິ່ນ ເພື່ອເຮັດໃຫ້ການເຄື່ອນໄຫວວຽກງານວິຊາເພາະຄັງເງິນ ມີຄວາມເຂັ້ມແຂງ.
ນອກຈາກນັ້ນ, ຄະນະວິຊາການ ຄັງເງິນແຫ່ງຊາດ ຍັງລົງເຮັດວຽກຮ່ວມກັບຄະນະຮັບຜິດຊອບຄັງເງິນແຫ່ງລັດ ສສ ຫວຽດນາມ ຢູ່ ຄັງເງິນແຂວງຮາຍຟອງ, ຄັງເງິນແຂວງຮາຍເຢືອງ ແລະ ຄັງເງິນເມືອງ (ແຂວງຮາຍຟອງ ແລະ ແຂວງຮາຍເຢືອງ) ເພື່ອລົງເລິກວຽກງານຕົວຈິງຢູ່ຂັ້ນທ້ອງຖິ່ນ.
ຊົມເຊີຍການຮ່ວມມືພິເສດລະຫວ່າງ ຄັງເງິນແຫ່ງຊາດ ສປປ ລາວ ກັບ ຄັງເງິນແຫ່ງລັດ ສສ ຫວຽດນາມ ຄົບຮອບ 14ປີ (20 ຕຸລາ 2008 ຫາ 20 ຕຸລາ 2022)
