ກອງປະຊຸມໃຫຍ່ສະມາຊິກພັກ ຄັ້ງທີ III ຂອງຄະນະພັກຮາກຖານຄັງເງິນແຫ່ງຊາດ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າ ຂອງວັນທີ 20 ກຸມພາ 2020; ຊຶ່ງໃຫ້ກຽດເຂົ້າຮ່ວມໂດຍ ສະຫາຍ ສົມດີ ດວງດີ, ກໍາມະການ ສູນກາງພັກ, ເລຂາຄະນະບໍລິຫານງານພັກກະຊວງການເງິນ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ. ກອງປະຊຸມໃຫຍ່ຄັ້ງນີ້ພາຍໃຕ້ການເປັນປະທານ ຂອງສະຫາຍ ນາງ ວັນພອນ ພົມມະສອນ ກໍາມະການຄະນະບໍລິຫານງານ ພັກກະຊວງການເງິນ, ເລຂາຄະນະພັກຮາກຖານຄັງເງິນແຫ່ງຊາດ, ມີບັນດາສະຫາຍ ຄະນະພັກຮາກຖານ, ຄະນະໜ່ວຍພັກ, ສະມາຊິກພັກສົມບູນ ແລະ ສໍາຮອງ ເຂົ້າຮ່ວມທັງໝົດ 51 ສະຫາຍ, ຍິງ 24 ສະຫາຍ, ແຂກທີ່ຖືກເຊີນ ຈໍານວນ 14 ສະຫາຍ, ຍິງ 4 ສະຫາຍ; ໃນນັ້ນ ມີສະມາຊິກພັກສົມບູນ ຈໍານວນ 46 ສະຫາຍ, ຍິງ 23 ສະຫາຍ. ກອງປະຊຸມໄດ້ດໍາເນີນໄປດ້ວຍຄວາມຮັບຜິດຊອບສູງ ຂອງບັນດາສະຫາຍສະມາຊິກພັກ, ແຂກຖືກເຊີນ, ເຮັດໃຫ້ກອງປະຊຸມໃຫຍ່ ໄດ້ດໍາເນີນໄປດ້ວຍຄວາມເປັນລະບຽບຮຽບຮ້ອຍ, ມີບັນຍາກາດອັນຟົດຟື້ນ ຕໍ່ຜົນງານ ແລະ ຜົນສໍາເລັດອັນໃຫຍ່ຫຼວງ ເພື່ອຂໍ່ານັບຊົມເຊີຍ ແລະ ຂໍ່ານັບຮັບຕ້ອນ ວັນສໍາຄັນປະຫວັດສາດ ຂອງພັກ, ຂອງຊາດ ທີ່ຈະໝູນວຽນມາເຖິງ; ຊຶ່ງສາມາດສັງລວມໄດ້ຄືດັ່ງນີ້ :
I. ກອງປະຊຸມໃຫຍ່ ໄດ້ເປັນເອກະສັນຮັບຮອງເອົາ ບົດລາຍງານການເມືອງ ແລະ ບົດສໍາຫລວດການນໍາພາລວມ ຂອງຄະນະພັກຮາກຖານຄັງເງິນແຫ່ງຊາດ ຊຶ່ງໄດ້ສະຫລຸບສັງລວມ ຕີລາຄາການນໍາພາ-ຊີ້ນໍາ ຢ່າງຮອບດ້ານໃນທຸກຂົງເຂດວຽກງານ ໃນໜຶ່ງສະໄໝຜ່ານມາ ແຕ່ປີ 2015-2019 ຢ່າງຖືກຕ້ອງຕາມຄວາມເປັນຈິງ ໂດຍຍົກໃຫ້ເຫັນ ດ້ານດີພົ້ນເດັ່ນ, ດ້ານອ່ອນຄົງຄ້າງ ແລະ ໄດ້ກໍານົດທິດທາງ, ແຜນການ, ຄາດໝາຍ ສູ້ຊົນ ແຕ່ປີ 2020-2025; ຊຶ່ງຈະໄດ້ເພີ່ມທະວີວຽກງານການສຶກສາອົບຮົມການເມືອງແນວຄິດ, ຍົກສູງບົດບາດການນໍາພາຂອງພັກ, ຕັ້ງໜ້າປັບປຸງກໍ່ສ້າງໜ່ວຍພັກໃຫ້ປອດໃສ ເຂັ້ມແຂງ ໜັກແໜ້ນ ຕາມທີ່ໄດ້ກໍານົດໄວ້ໃນມະຕິກອງປະຊຸມໃຫຍ່ ຄັ້ງທີ III ຂອງຄະນະພັກ ຮາກຖານຄັງເງິນແຫ່ງຊາດ ວາງອອກ ແຕ່ປີ 2020-2025 ໃຫ້ປະກົດຜົນເປັນຈິງ.
II. ຜູ້ແທນກອງປະຊຸມໃຫຍ່ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາ ຄະນະພັກຮາກຖານຄັງເງິນແຫ່ງຊາດ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ຢ່າງຖືກຕ້ອງ ແລະ ຄອດຄ່ອງກັບ ມາດຖານ, ເງື່ອນໄຂທີ່ກໍານົດໄວ້; ຊຶ່ງມີຜູ້ສະໝັກຮັບເລືອກຕັ້ງ ຈໍານວນ 07 ສະຫາຍ, ໃນນັ້ນ ເລືອກເອົາ 05 ສະຫາຍ ແລະ ໄດ້ເປີດກອງປະຊຸມຄັ້ງປະຖົມມະລຶກ ໄດ້ເປັນເອກະສັນຢ່າງສົມບູນ ເພື່ອມອບໝາຍ ແລະ ແບ່ງຄວາມຮັບຜິດຊອບ ຄືດັ່ງນີ້ :
1). ສະຫາຍ ນາງ ວັນພອນ ພົມມະສອນ ເປັນເລຂາຄະນະພັກຮາກຖານ;
2). ສະຫາຍ ພຸດທະຂັນ ຂັນຕີ ເປັນຮອງເລຂາ ແລະ ປະທານກວດກາພັກ;
3). ສະຫາຍ ໜູເຊີຍ ພົມສີຈັນ ເປັນກໍາມະການຄະນະພັກຮາກຖານ;
4). ສະຫາຍ ນາງ ການ ສີງທາວົງໄຊ ເປັນກໍາມະການຄະນະພັກຮາກຖານ;
5). ສະຫາຍ ວັນເພັງ ກ້ານ ເປັນກໍາມະການຄະນະພັກຮາກຖານ;
III. ກອງປະຊຸມໄດ້ປ່ອນບັດເລືອກຕັ້ງເອົາຜູ້ແທນສົມບູນ ແລະ ສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ III ຂອງຄະນະບໍລິຫານງານພັກກະຊວງການເງິນ, ຊຶ່ງມີຜູ້ສະໝັກຮັບເລືອກຕັ້ງ ຈໍານວນ 26 ສະຫາຍ, ໃນນັ້ນ ເລືອກໄດ້ ຜູ້ແທນສົມບູນ 15 ສະຫາຍ, ຜູ້ແທນສໍາຮອງ 02 ສະຫາຍ ມີຄືດັ່ງນີ້:
ກ. ຜູ້ແທນສົມບູນ.
- ສະຫາຍ ນາງ ວັນພອນ ພົມມະສອນ;
- ສະຫາຍ ພຸດທະຂັນ ຂັນຕີ;
- ສະຫາຍ ໜູເຊີຍ ພົມສີຈັນ;
- ສະຫາຍ ນາງ ບົວເລິງຄິນ ດວງສະຫວັນ;
- ສະຫາຍ ນາງ ການ ສິງທາວົງໄຊ;
- ສະຫາຍ ວັນເພັງ ກ້ານ;
- ສະຫາຍ ມີໄຊ ພຸດທະວົງ;
- ສະຫາຍ ບຸນຈັນ ມະນີວົງ;
- ສະຫາຍ ດວງປະເສີດ ທິພົມມະຈັນ;
- ສະຫາຍ ນາງ ຄໍາໝາຍ ບຸນທະວີ;
- ສະຫາຍ ນາງ ບຸດສະດີ ຄໍາມະນີວົງ;
- ສະຫາຍ ນາງ ໜູຈັນ ໄຊຍະສອນ;
- ສະຫາຍ ພູຈັນ ແກ້ວປະເສີດ;
- ສະຫາຍ ນາງ ເນກຂະຫຼາ ຈັນທະວົງ;
- ສະຫາຍ ນາງ ຂວັນແພງ ກຸນນະວົງ.
ຂ. ຜູ້ແທນສໍາຮອງ 02 ສະຫາຍ. - ສະຫາຍ ສົມບູນ ພັນດານຸວົງ;
- ສະຫາຍ ສີວິໄຊ ອານົນ.
IV. ກອງປະຊຸມໄດ້ໃຫ້ກຽດຮັບຟັງການໂອ້ລົມ ໃຫ້ຄໍາໂອວາດຕັກເຕືອນ ຂອງສະຫາຍ ສົມດີ ດວງດີ, ກໍາມະການ ສູນກາງພັກ, ເລຂາຄະນະບໍລິຫານງານພັກກະຊວງການເງິນ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ເຊິ່ງໄດ້ຮຽກຮ້ອງມາຍັງບັນດາສະຫາຍ ຄະນະພັກຮາກຖານ, ສະມາຊິກພັກ ທຸກສະຫາຍ ຕ້ອງໄດ້ຖືເອົາມະຕິ ຂອງກອງປະຊຸມໃຫຍ່ຄະນະພັກຮາກຖານຂອງຕົນໃນຄັ້ງນີ້ ນໍາໄປຄົ້ນຄ້ວາ, ເຊື່ອມຊຶມ, ກໍາແໜ້ນ ແລະ ຈັດຕັ້ງຜັນຂະຫຍາຍໃຫ້ເປັນ ແຜນການ, ແຜນງານ ຕາມທິດທາງ ແລະ ຄາດໝາຍສູ້ຊົນ ແຕ່ລະດ້ານ ເພື່ອພ້ອມກັນເຮັດສໍາເລັດໜ້າທີ່ການເມືອງ ຂອງພັກໄດ້ມອບໝາຍໃຫ້.
