ໃນຕອນເຊົ້າຂອງວັນທີ 14 ກັນຍາ 2020 ໄດ້ມີພິທີເປິດຊຸດຝຶກອົບຮົມວຽກງານວິຊາສະເພາະຄັງເງິນ ໄລຍະສັ້ນ ປີ 2020 ທີ່ວິທະຍາໄລການເງິນພາກເໜືອ, ແຂວງຫຼວງພະບາງ. ໂດຍການເປັນປະທານຂອງທ່ານ ອຸໄທ ອິນທິລາດ ຮອງຫົວໜ້າກົມຈັດຕັ້ງ, ກະຊວງການເງິນ, ແລະ ປະທານຮ່ວມໂດຍທ່ານ ພຸດທະຂັນ ຂັນຕີ ຮອງຫົວໜ້າ ຄັງເງິນແຫ່ງຊາດ,ນອກນັ້ນ ຍັງມີບັນດາແຂກທີ່ຖືກເຊີນ ຄື: ທ່ານຮອງຫົວໜ້າພະແນກການເງິນ ແຂວງຫຼວງພະບາງ, ຫົວໜ້າຄັງເງິນ ແຫ່ງຊາດປະຈໍາແຂວງຫຼວງພະບາງ ແລະ ທ່ານ ອໍານວຍການວິທະຍາໄລການເງິນພາກເໜືອ ແຂວງ ຫຼວງພະບາງ ເຂົ້່າຮ່ວມ. ກອງປະຊຸມດັ່ງກ່າວຈະດໍາເນີນເປັນເວລາທັງໝົດ 10 ວັນເຕັມ; ຊຶ່ງມີນັກສໍານາກ່ອນພະນັກງານວິຊາການ ຂອງຄັງເງິນແຫ່ງຊາດ ຈາກບັນດາແຂວງພາກກາງ ແລະ ພາກເໜືອ ເຊັ່ນ: ຄັງເງິນແຫ່ງຊາດປະຈໍາ ແຂວງ ວຽງຈັນ, ຜົ້ງສາລີ, ຫຼວງນໍ້າທາ, ອຸດົມໄຊ, ບໍ່ແກ້ວ, ຫຼວງພະບາງ, ຫົວພັນ, ໄຊຍະບູລີ ແລະ ຊຽງຂວາງ ຈໍານວນ 36 ທ່ານ ແລະ ພະນັກງານຄູຈາກວິທະຍາໄລ ການເງິນພາກເໜືອຈໍານວນ 3 ທ່ານເຂົ້າຮ່ວມນໍາ ລວມເປັນທັງໝົດ 39 ທ່ານ.
ຈຸດປະສົງການຝຶກອົບຮົມ ແມ່ນເພື່ອສ້າງຄວາມເຂັ້ມແຂງໃຫ້ພະນັກງານ ຄັງເງິນແຫ່ງຊາດ ຢູ່ຂັ້ນແຂວງ ແລະ ເມືອງ ແລະ ມີຄວາມເປັນເອກະພາບກັນໃນການຈັດຕັ້ງປະຕິບັດວຽກງານຄັງເງິນ ໃນຂອບເຂດທົ່ວປະເທດ ຊຶ່ງບັນຫາຫົວຂໍ້ໃນການຝຶກອົບຮົມ ໃນຄັ້ງນີ້ ປະກອບດ້ວຍ ① ວຽກງານກວດກາເອກະສານລາຍຈ່າຍງົບປະມານ ຜ່ານລະບົບຄັງເງິນແຫ່ງຊາດ, ② ວຽກງານບໍລິການ ຄັງເງິນທີ່ຕິດພັນກັບບັນດາພະແນກການ ແລະ ບັນດາ ສາຂາທະນາຄານ, ③ ວຽກງານການບັນຊີ ເປັນຕົ້ນແມ່ນການບັນ ທຶກບັນຊີ, ການສ້າງ ແລະ ສັງລວມໃບດຸ່ນດຽງ ແລະ ວຽກງານສະສາງບັນຊີທ້າຍປີ ④ ວຽກງານຂໍ້ມູນຂ່າວສານ ແລະ ຫັນວຽກງານຄັງເງິນເປັນທັນສະໄໝ, ພ້ອມນັ້ນກໍ່ຈະໄດ້ມີການເຜີຍແຜ່ນິຕິກໍາທີ່ຕິດພັນ ກັບວຽກງານວິຊາສະເພາະຄັງເງິນ ຢູ່ແຂວງ ແລະ ເມືອງ.
ໃນການຝຶກອົບຮົມໃນຄັ້ງນີ້ ທ່ານປະທານກອງປະຊຸມ ໄດ້ຮຽກຮ້ອງ ໃຫ້ບັນດານັກວິທະຍາກອນ ແລະ ນັກສໍາມະນາກອນທຸກ ທ່ານ ເອົາໃຈໃສ່ສຸມຈິດສຸມໃຈ, ລະດົມຄວາມຄິດ, ແລກປ່ຽນບົດຮຽນ, ມີຄໍາຖາມເຈາະຈີ້ມ, ຖາມ-ຕອບ ບັນຫາທີ່ພົບ ເຫັນຕົວຈິງໃນການຈັດຕັ້ງປະຕິບັດວຽກງານວິຊາສະເພາະຂອງຄັງເງິນຂອງຕົນທີ່ຜ່ານມາ ເພື່ອເປັນການແລກປ່ຽນບົດຮຽນ ຊອກຫາວິທີແກ້ໄຂ້. ຮຽກຮ້ອງໃຫ້ທຸກຄົນປະຕິບັດລະບຽບເວລາການຂື້ນຫ້ອງ-ລົງຫ້ອງ ຢ່າງເຄັ່ງຄັດ ແລະ ເຂົ້າຮ່ວມການຝຶກ ອົບຮົມແບບຕໍ່ເນື່ອງຕາມວາລະທີ່ໄດ້ກໍານົດໄວ້. ເພື່ອຮັບປະກັນການຝຶກ ອົບຮົມໃຫ້ສໍາເລັດຕາມລະດັບຄາດໝາຍ ແລະເພື່ອປະຕິບັດໜ້າທີ່ການເມືອງທີ່ຂັ້ນເທີງມອບໝາຍໃຫ້.
