ຄັງເງິນແຫ່ງຊາດ ຈັດເປີດຊຸດຝຶກອົບຮົມວຽກງານວິຊາສະເພາະໃຫ້ພະນັກງານຄັງເງິນແຫ່ງຊາດປະຈຳແຂວງ ພາກກາງ ແລະ ພາກໃຕ້ ໄລຍະສັ້ນ ປະຈໍາປີ 2020

ໃນວັນທີ 12 ຕຸລາ 2020 ນີ້, ໄດ້ເປິດຊຸດຝຶກອົບຮົມວຽກງານວິຊາສະເພາະໃຫ້ພະນັກງານ-ລັດຖະກອນ ວິຊາການຄັງເງິນແຫ່ງຊາດ ໄລຍະສັ້ນ ປະຈຳປີ 2020 ຂຶ້ນທີ່ ວິທະຍາໄລການເງິນພາກໃຕ້ ແຂວງຈໍປາສັກ ໂດຍການເປັນປະທານຂອງທ່ານນາງ ວັນພອນ ພົມມະສອນ ຫົວຫນ້າຄັງເງິນແຫ່ງຊາດ ແລະ ທ່ານນາງ ບຸດສະດີ ຄໍາມະນີວົງ ຫົວໜ້າພະແນກຈັດຕັ້ງ ບໍລິຫານ ແລະ ການເງິນ ແລະ ທ່ານ ພອນສຸກ ສິດທິລາດວົງສາ ຮອງຫົວຫນ້າພະແນກກວດກາ ແລະ ນິຕິກໍາ ເຊີ່ງມີ ຮອງຫົວໜ້າພະແນກ ຮອງພະແນກການເງິນຂອງແຂວງ, ຫົວໜ້າຄັງເງິນແຫ່ງຊາດປະຈໍາແຂວງ, ຮອງອໍານວຍການວິທະຍາໄລການເງິນພາກໃຕ້ ແຂວງຈໍາປາສັກ ພ້ອມດ້ວຍ ນັກວິທະຍາກອນ ນັກສໍາມະນາກອນ ເຂົ້າຮ່ວມ.
ຊຸດຝຶກອົບຮົມດັ່ງກ່າວ, ດໍາເນີນເປັນເວລາທັງໝົດ 10 ວັນ, ຊຶ່ງນັບແຕ່ວັນທີ 12-21 ຕຸລາ 2020 ຢູ່ ວິທະຍາໄລການເງິນພາກໃຕ້ ແຂວງ ຈໍາປາສັກ ການຝຶກອົບຮົມໃນຄັ້ງນີ້ ມີນັກສໍາມະນາກອນ ຈາກຄັງເງິນແຫ່ງຊາດຂັ້ນແຂວງ 09 ແຂວງ ແລະ 19 ເມືອງ ຈາກພາກກາງ ແລະ ພາກໃຕ້ ຄື: ນະຄອນຫຼວງວຽງຈັນ, ແຂວງ ບໍລິຄໍາໄຊ, ແຂວງໄຊສົມບູນ, ແຂວງຄໍາມ່ວນ, ແຂວງສະຫວັນະເຂດ, ແຂວງ ສາລະວັນ, ແຂວງ ເຊກອງ, ແຂວງຈໍາປາສັກ ແລະ ແຂວງອັດຕະປື ນອກນັ້ນ, ຍັງມີນັກສໍາມະນາກອນ ຈາກວິທະຍາໄລ ການເງິນພາກ ໃຕ້ 03 ທ່ານ ລວມທັງໝົດເປັນ 40 ທ່ານ.
ຈຸດປະສົງເພື່ອສ້າງຄວາມເຂັ້ມແຂງໃຫ້ພະນັກງານຄັງເງິນແຫ່ງຊາດຢູ່ຂັ້ນແຂວງ ແລະ ເມືອງໃຫ້ມີຄວາມເປັນເອກະພາບ ໃນການຈັດຕັ້ງປະຕິບັດວຽກງານຄັງເງິນ ໃນຂອບເຂດທົ່ວປະເທດ, ຊຶ່ງຫົວຂໍ້ໃນການຝຶກອົບຮົມ ໃນຄັ້ງນີ້ມີວຽກງານກວດກາເອກະສານລາຍຈ່າຍງົບປະມານຜ່ານລະບົບຄັງເງິນແຫ່ງຊາດ,ວຽກງານບໍລິການຄັງເງິນທີ່ຕິດພັນກັບບັນດາພະແນກການ ແລະ ບັນດາສາຂາທະນາຄານ, ວຽກງານການບັນຊີເປັນຕົ້ນ: ການບັນທຶກບັນຊີ, ການສ້າງ ແລະ ສັງລວມໃບດຸ່ນດຽງ, ວຽກງານສະສາງບັນຊີທ້າຍປີ, ວຽກງານຂໍ້ມູນຂ່າວສານ ແລະ ການຫັນວຽກງານ ຄັງເງິນເປັນທັນສະໄໝ, ພ້ອມດຽວກັນນີ້, ໄດ້ມີການເຜີຍແຜ່ນິຕິກໍາທີ່ຕິດພັນກັບວຽກງານວິຊາສະເພາະຄັງເງິນ ຢູ່ ແຂວງ ແລະ ເມືອງນຳອີກດ້ວຍ.
ໂອກາດນີ້, ທ່ານ ນາງ ວັນພອນ ພົມມະສອນ ຫົວຫນ້າຄັງເງິນແຫ່ງຊາດ ໄດ້ໂອ້ລົມ ມີຄໍາຄີດຄໍາເຫັນ ພ້ອມທັງ ຮຽກຮ້ອງໃຫ້ບັນດານັກວິທະຍາກອນ ແລະ ນັກສໍາມະນາກອນ, ເອົາໃຈໃສ່, ລະດົມຄວາມຄິດ, ແລກປ່ຽນບົດຮຽນ, ມີຄໍາຖາມເຈາະຈີ້ມ, ຖາມ-ຕອບ ບັນຫາທີ່ພົບຕົວຈິງໃນການຈັດຕັ້ງປະຕິບັດວຽກງານວິຊາສະເພາະຂອງຄັງເງິນໃນໄລຍະຜ່ານມາ, ເພື່ອເປັນການແລກປ່ຽນບົດ ຮຽນຊອກຫາວິທີແກ້ໄຂ້. ເພື່ອຮັບປະກັນການປະຕິບັດໜ້າທີ່ການເມືອງທີ່ຂັ້ນເທີງມອບໝາຍໃຫ້.
ພາບ ແລະ ຂ່າວ: ກະຊວງການເງິນ